సింగరేణి ఏరియా ఎమ్మెల్యేల్లో గుబులు

వారంతా అధికార పార్టీ ఎమ్మెల్యేలు...కానీ నియోజక వర్గాల్లోకి వెళ్ళాలి అంటే భయపడుతున్నారు. ముఖ్యమంత్రి కేసీఆర్ తీసుకున్న నిర్ణయం తమకు ఇబ్బందిగా మారిందని ఆ ఎమ్మెల్యేలు వాపోతున్నారు. ఇంతకీ ఇబ్బందులు పడుతున్న ఆ ఎమ్మెల్యేలు ఎవరు... ఏ విషయంలో ముఖ్యమంత్రి కేసీఆర్ పైన వారు గుర్రుగా ఉన్నారు. మరి ఆ ఎమ్మెల్యేల పరిస్థితి ఏంటి?

అధికార పార్టీ ఎమ్మెల్యేలుగా ఉన్న కొందరు ఎమ్మెల్యేలకు ఇబ్బందులు తప్పడం లేదు. ముఖ్యమంత్రి కేసీఆర్ తీసుకున్న ఒకే ఒక నిర్ణయం తమకు ఇబ్బందులు తెస్తున్నాయని వారంతా బాధపడుతున్నారు. ప్రభుత్వ రంగ సంస్థల్లో యూనియన్లు ఉండొద్దని చెప్పిన ముఖ్యమంత్రి కేసీఆర్ ...ఆర్టీసీ యూనియన్లను రద్దు చేసి యూనియన్ ఆఫీసులకు తాళాలు వేయడంతో ఆ ప్రభావం తమపైన పడిందంటున్నారు గులాబీ పార్టీ  ఎమ్మెల్యేలు. అంతేకాదు సింగరేణి కార్మికులకు ఎన్నికలు నిర్వహించకుండా ఆలస్యం చేయడంతో సింగరేణి పరిధిలోని ఎమ్మెల్యేలు తమ నియోజక వర్గాల్లో అసంతృప్తి పెరుగుతోందని భయపడుతున్నారు. మంచిర్యాల, బెల్లంపల్లి, ఇల్లందు, కొత్తగూడెం, రామగుండం, భూపాల పల్లి, నియోజకవర్గాల ఎమ్మెల్యేలు సింగరేణి కార్మికులకు ఎన్నికలు నిర్వహిస్తే బాగుండని అనుకుంటున్నారు. 

ఆర్టీసీ కార్మికుల సంఘాలను క్లోజ్ చేసినట్లే సింగరేణిలో కూడా కార్మికుల సంఘాలను రద్దు చేసే యోచనలో ప్రభుత్వం ఉన్నట్లు చర్చ జరుగుతోంది. అందుకే ఇప్పటి వరకు సింగరేణి కార్మికులకు ఎన్నికలు నిర్వహించడం లేదని ప్రచారం జరుగుతోంది. సింగరేణిలో టీఆర్ఎస్ అనుబంధ సంఘం, సింగరేణి బొగ్గు గని కార్మిక  సంఘం కొంచెం వీక్ అవ్వడం బీజేపీ అనుబంధ సంఘం బియంయస్ బలంగా అవ్వడం కూడా ఒక కారణం అని అనుకుంటున్నారు. దీంతో సింగరేణి పరిధిలోని ఎమ్మెల్యేలు ముఖ్యమంత్రి కేసీఆర్ ని కలవాలని అనుకుంటున్నారని సమాచారం.

సింగరేణి పరిధిలోని ఎమ్మెల్యేలు ముఖ్యమంత్రి కేసీఆర్ ని కలవాలని అనుకుంటున్నారట. సింగరేణి కార్మిక సంఘాన్ని క్లోజ్ చేస్తే తమ పైన నియోజక వర్గాల్లో అసంతృప్తి పెరిగి రానున్న ఎన్నికల్లో  పార్టీ పైన ప్రభావం పడే ఛాన్స్ ఉందని ముఖ్యమంత్రి కి చెప్పాలని డిసైడ్ అయ్యారని తెలుస్తోంది. మరి ముఖ్యమంత్రి కేసీఆర్ ఆ ఎమ్మెల్యేలకు అపాయింట్ మెంట్ ఇస్తారా....సింగరేణి కార్మిక సంఘాల పైన సీఎంకి ఎలాంటి అభిప్రాయం ఉందొ చూడాలి.