చైనా పెట్టుబడులకు ఇండియా చెక్

Photo: cnn.com

కరోనా పుణ్యమా అని భారత్ ఆలస్యంగానైనా కళ్లు తెరిచింది. మన సరిహద్దుల్ని ఆనుకునే ఉన్న డ్రాగన్ కంట్రీ కుట్రపూరితమైన ఆర్థిక సామ్రాజ్యవాదానికి తొలి చెక్ పెట్టింది. కరోనా మహమ్మారిని కట్టడి చేస్తున్న ఆపరేషన్లో భాగంగానే హుటాహుటిన ఎఫ్.డి.ఐ పాలసీని సవరించింది. దీని ప్రకారం మన దేశ సరిహద్దులు ఆనుకొని ఉన్న దేశాలు ఇకపై నేరుగా భారత్ లోని కంపెనీలతో ఒప్పందాలు కుదుర్చుకోవడం గానీ, పెట్టుబడులు పెట్టడం గానీ చేయడానికి వీల్లేదు. అలాగే భారత్ లోని కంపెనీలు కూడా యాజమాన్య హక్కుల బదలాయింపులు గానీ, కంపెనీల విస్తరణ గానీ, నూతన భాగస్వాములు, పెట్టుబడుల సేకరణ విషయంలో మన సరిహద్దుల్ని ఆనుకొని ఉన్న దేశాలతో కుదుర్చుకోవాలంటే భారత ప్రభుత్వం అనుమతి తప్పనిసరి. తాజా ఎఫ్.డి.ఐ నిబంధనల సవరణ ప్రధానంగా చైనాను, అది విసిరే ఆర్థికపరమైన పెను సవాళ్లను ఎదుర్కోవడానికేనని భావిస్తున్నారు. 

 

చైనాను పూర్తిగా నమ్మి పెట్టుబడులకు తలుపులు బార్లా తెరిచి ఇటలీలోని దేశీయ ఇండస్ట్రీని చేజేతులా నాశనం చేసుకున్న ఆ దేశం.. చాలా ఆలస్యంగా ఆ విషయాన్ని గుర్తించింది. కరోనా విజృంభించి శవాల దిబ్బగా మారిన తరుణంలోనే ఇటలీ పునరాలోచనలో పడింది. ఇటలీతో పాటు అదే స్థాయిలో దెబ్బతిన్న స్పెయిన్, ఫ్రాన్స్ వంటి దేశాలు కూడా చైనాతో వ్యాపార సంబంధాలపై కొత్తగా ఆంక్షలు విధించాయి. ఇప్పుడిదే అదునుగా భారత్ కూడా చైనా పెట్టుబడులకు చెక్ పెట్టింది. దీంతో చైనాలోని ఏ కంపెనీ, ఇండియాలోని ఏ కంపెనీతో ఎలాంటి ఒప్పందం కుదుర్చుకుంటుంది? ఎంత పెట్టుబడి పెడుతుంది? దాని ఉత్పత్తులు ఏంటి? అనే కీలకమైన సమాచారం తెలుసుకునే వీలుంది. ఇప్పటివరకు ఇది ఉండేది కాదు. 

 

ఇప్పుడున్న ఎఫ్.డి.ఐ. నిబంధనలు అనుమతిస్తున్న ప్రకారం భారత్ లో ప్రతి 30 చిన్నతరహా కంపెనీల్లో 18 కంపెనీలకు చైనా పెట్టుబడులు ప్రవహిస్తున్నాయని, ఇకపై అలాంటి అవకాశం ఉండదని అధికారులు చెబుతున్నారు. 2000 నుంచి 2019 వరకు 2.34 బిలియన్ డాలర్ల పెట్టుబడులు (దాదాపు 15 కోట్లు) ప్రవహిస్తే, అదే బంగ్లాదేశ్ నుంచి 48 లక్షలు, నేపాల్ నుంచి 18 కోట్లు, మయన్మార్ నుంచి 35 కోట్లు, అఫ్ఘనిస్తాన్ నుంచి 16 కోట్లు వచ్చాయి. ఇక పాకిస్తాన్, భూటాన్ నుంచి ఎలాంటి పెట్టుబడులూ రాలేదు. ఇటీవల భారత్ లోని ప్రధాన ప్రైవేట్ బ్యాంకు అయిన హెచ్.డి.ఎఫ్.సి లోకి 1 శాతం పెట్టుబడులు పెంచడాన్ని భారత్ అనుమానిస్తోంది. చైనా ఇతర దేశాలతో కుదుర్చుకునే ఒప్పందాలతో లబ్ధి పొందేది, పెట్టుబడులు పెట్టేది ఆ దేశంలోని కమ్యూనిస్టు పార్టీ నేతలేనని భారత్ ఎప్పుడో గుర్తించింది. ఇలాంటి పెట్టుబడులు భారత్ కు తెలిసి, అధికారికంగా, అనుమతుల ద్వారా వచ్చినవి కావు. మన దేశంలోని చిన్న కంపెనీలతో నేరుగా ఒప్పందాలు కుదుర్చుకొని పెట్టిన పెట్టుబడులు. దక్షిణాసియా మీద కన్నేసినా చైనా ఇప్పటికే హిందూ మహాసముద్రాన్ని ఆనుకున్న దేశాలను గుప్పిట్లో పెట్టుకునేందుకు అనేక ఎత్తుగడలు వేస్తోంది. ఈ క్రమంలోనే సరిహద్దు నిబంధనలు ఉపయోగించుకొని భారత్ లోకి దొడ్డిదారిన పెట్టుబడులు గుమ్మరించే యోచనలో ఉందని ఇటీవలి అనుభవాల్ని బట్టి భారత్ బలంగా అనుమానిస్తోంది. 

 

చైనా కదలికల మీద ఓ కన్నేసి ఉంచిన భారత్ కరోనా ప్రభావం కారణంగా నూతన పాలసీలు తీసుకురావడం మొదలు పెట్టిందని ఈ నిర్ణయంతో చెప్పకనే చెబుతోంది. ఆ నిర్ణయం కూడా చైనాతోనే మొదలుపెట్టడం.. ప్రపంచ దేశాలకు తానొక ప్రపంచ ఆర్థిక శక్తి అన్న సంకేతాలు పంపేందుకే అన్న అభిప్రాయాలు కూడా వినిపిస్తున్నాయి. అటు సెబీ కూడా భారత్ లోని అన్ని కంపెనీలకు పెట్టుబడుల ప్రవాహంపై వివరాలు కోరడం గమనించాల్సిన అంశం.  ఈ పరిణామంతో చైనా వస్తువులు ఇకపై ఇండియా మార్కెట్ లోకి ఇబ్బడిముబ్బడిగా వచ్చే వీలుండదు. చైనా పెట్టుబడుల కోసం అర్రులు చాచే భారత్ లోని కొందరు పెట్టుబడిదారులకు చెక్ పకడుతుంది. స్వలాభాల కోసం సులువైన భారత మార్కెట్ మీద చైనా పెత్తనానికి బ్రేక్ పడుతుంది. అయితే ఎఫ్.డి.ఐ నిబంధనల సవరణ అనేది తొలి అడుగేనని, లాక్ డౌన్ నుంచి బయట పడ్డాక మరిన్ని పటిష్టమైన నిర్ణయాలు వెలువడతాయని నిపుణులు అంచనా వేస్తున్నారు.