భూ మాఫియా అవతారంలో కొందరు బీసీలు

   

రంగారెడ్డి జిల్లా మాడుగుల మండలం ఇర్విన్ గ్రామంలో ఒక భూవివాదంలో జరిగిన దాడి రెవిన్యూ విభాగంలోని అనేక చీకటి పార్శ్వాలను మరోసారి తెరమీదికి తెస్తోంది. మన దేశంలో, రాష్ట్రంలో పబ్లిక్ సర్వెంట్స్ కు ఉన్న స్వేచ్ఛ, ప్రత్యేకాధికారాలు ప్రజలకు లేవని మరోసారి రుజువైంది. ఫిర్యాదుదారులు ప్రజలే, బాధితులు కూడా ప్రజలే అవుతుండగా.. ఆ ఇద్దరి మధ్యా లేని వివాదాలు సృష్టించి, ఉన్న వివాదాలను పెంచి.. వారి మధ్య  వైషమ్యాలను శాశ్వతంగా పెంచి పోషిస్తున్నది స్వయంగా అధికారులేనన్న ఆరోపణలు సర్వత్రా వినిపిస్తున్నాయి. అంతేకాదు.. అసమగ్రంగా ఉన్న భూ రికార్డులు, అసలు రికార్డులకే ఎక్కని భూములు, తరతరాలుగా సాగు చేసుకుంటున్న ఇనాం భూములను ఆసరా చేసుకొని కలిసి జీవించే ప్రజా వర్గాల మధ్య చిచ్చుపెడుతున్నారన్న అభిప్రాయాలు వ్యక్తమవుతున్నాయి.  

 

బాధితుడు మక్రోజు పరిపూర్ణాచారి కథనం ప్రకారం... రంగారెడ్డి జిల్లా మాడుగుల మండలం ఇర్విన్ అనే గ్రామంలో తాతల కాలం నుంచి తనకు వారసత్వంగా వచ్చిన భూమిని సాగు చేసుకుంటున్నారు. శనివారం వ్యవసాయ భూమి దగ్గరకు వెళ్లిన పరిపూర్ణాచారికి అనుకోని దృశ్యం కనిపించింది. తన భూమిలో మరికొందరు వ్యక్తులు అదే భూమిలో పనులు చేయడంతో ఇదేంటని ప్రశ్నించారు. ఈ భూమి తనకు పట్టా అయిపోయిందని, తామే కొన్నామని, అడగడానికి నువ్వెవరు.. నీ దగ్గర  ఏముందని అవతలి వ్యక్తులు ఎదురు ప్రశ్నించారు. ఇక్కడ మాటామాటా పెరిగి తోసుకోవడం, విచక్షణ రహితంగా దాడి చేయడం దాకా వెళ్లింది. బాధితుడు మక్రోజు పరిపూర్ణాచారి అయితే.. దాడి చేసిన వ్యక్తులు దళపతిగౌడ్, మల్లేశ్ గౌడ్, అంజయ్య గౌడ్, పల్లేటి రాములు గా పేర్కొంటూ తన మీద వారు హత్యాయత్నానికి పాల్పడ్డారంటూ పరిపూర్ణాచారి పోలీస్ కంప్లయింట్ ఇచ్చారు. దాడి జరిగిన వీడియో దృశ్యాలను బట్టి చూస్తే అత్యంత ప్రమాదకరంగా కనిపిస్తున్నాయి. 

బాధితుడు పరిపూర్ణాచారి

 

ఇంతకీ వివాదం ఏంటి?

 

పరిపూర్ణాచారి పూర్వీకులకు నిజాం జమానాలోనే దాదాపు 10 ఎకరాలు ఇనాంగా దక్కాయి. అప్పటి నుంచీ వారు సాగు చేసుకుంటూ, వంశపారంపర్యంగా వారే అనుభవిస్తూ వస్తున్నారు. విశ్వబ్రాహ్మల్లో ఉండే పేదరికం, అవగాహనా లేమి, రెవిన్యూ అధికారుల చేతివాటం, ప్రభుత్వ యంత్రాంగంలో పేరుకుపోయిన నిర్లక్ష్యం వంటి అనేక కారణాల వల్ల దశాబ్దాలుగా వారు తమ పేరు మీద భూమిని పట్టా చేయించుకోలేదు. వంశపారంపర్యంగా దఖలుపడ్డ భూమిని ఎవరు ప్రశ్నిస్తారు అన్న భరోసానో లేక పట్టా చేయించుకునే స్తోమత లేకనో మొత్తానికి ఆ భూమి తమదేననే ధీమాతో ఉన్నారు. ఈ లోపు ఆ భూమికి చెందిన వీరి బంధువులకే కొందరు భూ బకాసురులు డబ్బు ఆశ చూపి.. పరిపూర్ణాచారి కుటుంబానికి కనీసం సమాచారం ఇవ్వకుండా ఏకపక్షంగా పట్టా చేయించుకున్నారు. ఇందులో కీలకంగా పనిచేసినవారు స్థానిక ఎమ్మార్వోనే కావడం విశేషం. ఇటీవలే రిటైరైన ఎమ్మార్వో తన రిటైర్మెంట్ కు రెండు నెలల ముందే ఈ భూమిని పట్టా చేసి ఇచ్చి వెళ్లిపోయాడని తెలుస్తోంది. పట్టా కాగితాలు చేతికొచ్చాక, ఎమ్మార్వో రిటైర్ అయిపోయాక నిదానంగా భూమ్మీద పడ్డారు భూ రాక్షసులు. 

 

భూ మాఫియా అవతారాలెత్తుతున్న బీసీ బిడ్డలు

డబ్బెవరికి చేదు? అలాగే భూమి ఎవరికి చేదు? హైదరాబాద్ పరిసరాల్లో కోట్లు గుమ్మరిస్తున్న రియల్ వ్యాపారంతో ఏటికేడు కోటీశ్వరులుగా మారిపోవచ్చన్న అత్యాశ అన్నివర్గాల్లో పెరిగిపోయింది. అలాగే అన్ని సామాజికవర్గాలకు అందుబాటులో ఉండే బీసీల్లోని కొన్ని వర్గాలు కూడా ఇదే అదనుగా మాఫియా అవతారాలెత్తుతున్నాయి. దళపతిగౌడ్, మల్లేశ్ గౌడ్, అంజయ్య గౌడ్ అనే ఒకే కుటుంబానికి చెెందిన వ్యక్తులు పరిపూర్ణాచారి భూమ్మీద కన్నేయడం ఇదే అంశాన్ని తేటతెల్లం చేస్తోంది. ఆ ముగ్గురికి తోడు పల్లేటి రాములు అనే ఎస్సీ కమ్యూనిటీకి చెందిన వ్యక్తి ఉన్నాడని బాధితులు చెబుతున్నారు. రెవెన్యూ అధికారులు ఇచ్చిన పక్కా సమాచారం, వారి అండను ఉపయోగించుకొని రిజిస్ట్రేషన్ కాని అంశాన్ని ఆసరా చేసుకొని, అదే పరిపూర్ణాచారి కుటుంబానికి చెందిన వ్యక్తులకు గాలం వేసి అతి చవక ధరకు భూమిని కొట్టేసే ప్లాన్ కు ఒడిగట్టారని పరిపూర్ణాచారి మాటల్ని బట్టి తెలుస్తోంది. కొంతమేర అడ్వాన్సుతో తమ ఆర్థిక అవసరాలు తీర్చుకోవచ్చన్న ఉద్దేశంతో చదువురాని పరిపూర్ణాచారి బంధువులు గౌడ్స్ బృందానికి రిజిస్ట్రేషన్ చేయించి పెట్టారు. పేపర్ చేతికి అందగానే భూబకాసురులు అసలురంగును చూపించారు.

 

పరిష్కారమేంటో బీసీ ఉద్యమ నేతలే చూపాలి

అణగారినవర్గాల హక్కులు, బీసీ ఉద్యమాలు అంటూ రాజకీయాధికారం కోసం పెనుగులాడుతున్న బీసీ ఉద్యమనేతలే గ్రామస్థాయిలో బీసీల మధ్య చిచ్చుపెడుతున్న ఇలాంటి భూ సమస్యలకు పరిష్కారం చూపాలన్న డిమాండ్లు వెల్లువెత్తుతున్నాయి. ఉద్యమ స్ఫూర్తి అంటే కేవలం అధికారంలోకి రావడమే కాదని, ప్రజాశ్రేణుల మధ్య నలుగుతున్న సమస్యలకు సరైన దిశలో పరిష్కారం చూపడమేనని సామాజికవేత్తలు అభిప్రాయపడుతున్నారు. మరి బీసీ సంక్షేమ సంఘం నేతలు ఎలా స్పందిస్తారో చూడాలి. మరోవైపు రెవిన్యూ ప్రక్షాళన చేస్తానంటున్న కేసీఆర్ సర్కారు.. అదే రెవిన్యూ అధికారుల చేతుల్లో మరిన్ని అరాచకాలు జరగకముందే, ఘోరాలు పెరగకముందే కళ్లు తెరిచి త్వరపడాలని పలువురు అభిప్రాయపడుతున్నారు. 

 

బాధితుడు పరిపూర్ణాచారి కుటుంబానికి సంఘీభావం ప్రకటించిన విశ్వకర్మ పరిరక్షణ సమితి నేతలు ముత్తోజు మధుకరాచారి, మేడోజు రామబ్రహ్మం ఆచారి, చేపూరి వీరాచారి తదితరులు