ఆ నియోజకవర్గంలో ఓట్లు చీలకుండా ఉండేందుకు బీఆర్ఎస్ అధిష్టానం వేసిన ఎత్తుగడ ఫలిస్తుందా? ఆ నియోజకవర్గంలో తిరుగులేని ఆధిపత్యాన్ని ప్రదర్శిస్తున్న మంత్రికి... మొన్నటివరకు బలమైన ప్రత్యర్థిగా ఉన్న ఆ నాయకుడు కూడా ఇప్పుడు జత కావడం మంత్రికి కలిసొస్తుందా? తనకు కలిసి రావడం కోసం మంత్రి ఈ స్కెచ్ వేశారా? లేక అవతలి పార్టీని దెబ్బ తీయడానికే ఆయన్ని కలుపుకున్నారా? సుదీర్ఘమైన అనుభవం, ప్రజలతో మంచి కనెక్షన్ ఉన్న ఆ నాయకుడు కారెక్కితే బీఆర్ఎస్ కు భారీ మెజారిటీ ఖాయమా? మొన్నటివరకు ప్రత్యర్థులుగా ఉన్న ఆ ఇద్దరు నేతలు ఇప్పుడు కారు పార్టీలో కలిసి మెలిసి తిరగడానికి కారణమేంటి? బీఆర్ఎస్ లో చేరిన ఆ నేత లక్ష్యమేంటి? గులాబీ బాస్‍ ఇచ్చిన ఆఫర్‍ ఏంటి?
Read this: కాంగ్రెస్ లో రేవంత్ "రెడ్ రాజకీయం"
Read this: హైదరాబాద్ లో అమెరికా ఆస్ట్రాలజీ యూనివర్సిటీ ప్రారంభం
వనపర్తి జిల్లా రాజకీయాల్లో కీలక పరిణామాలు చోటు చేసుకున్నాయి. సీనియర్ నాయకుడు, టీడీపీ పొలిట్ బ్యూరో సభ్యుడు రావుల చంద్రశేఖర్ రెడ్డి.. టీడీపీని వీడి బీఆర్ఎస్ లోకి వచ్చారు. రావులను బీఆర్‍ఎస్‍లోకి తీసుకు రావడం వెనుక అధికార బీఆర్ఎస్ అధిష్టానం ఎంతో పకడ్బందీగా వ్యవహరించినట్టు తెలుస్తోంది. ప్రస్తుతానికి వనపర్తి నియోజకవర్గంలో క్రియాశీల రాజకీయాలకు కొంత కాలంగా దూరంగా ఉంటూ వస్తున్న రావుల చంద్రశేఖర్ రెడ్డిని బీఆర్ఎస్ లోకి చేర్చుకోడానికి గులాబీ బాస్‍ పక్కా ప్రణాళికతో వ్యవహరించారన్న ప్రచారం సాగుతోంది. రావుల చంద్రశేఖర్ రెడ్డి.. గతంలో కూడా పలుమార్లు వివిధ పార్టీల్లో చేరుతారనే ప్రచారం జరిగినప్పటికీ.. ఆయన మాత్రం తాను చివరికి బీఆర్ఎస్ లోనే చేరేందుకు సుముఖత చూపారు. వనపర్తి నియోజకవర్గంలో కొందరు టీడీపీ నాయకులు చాలా మంది ఇప్పటికీ బీఆర్ఎస్ లోనే ఉన్నారు. ఇప్పుడు రావుల కూడా బీఆర్ఎస్ లో చేరడంతో వనపర్తి జిల్లాలో టీడీపీ పూర్తిగా కనుమరుగైందనే చెప్పాలి. రావుల, బీఆర్ఎస్ లో కలవడంతో వనపర్తి జిల్లాలో బీఆర్ఎస్ పార్టీకి మరింత బలం చేకూరినట్లైందన్న చర్చ ఆ జిల్లాలో జోరుగా సాగుతోంది.
ఐతే రావుల బీఆర్ఎస్ లో చేరడం వెనుక పెద్ద మతలబే ఉన్నట్టు తెలుస్తోంది. టీడీపీ అధినేత చంద్రబాబు నాయుడుకు రావుల చంద్రశేఖర్ రెడ్డి బినామీ అన్న ప్రచారం ఉంది. ఈ నేపథ్యంలో ఆంద్రప్రదేశ్‍ లో చంద్రబాబు జైలుకెళ్లడం, పార్టీ క్లిష్ట పరిస్థితుల్లో ఉన్న నేపథ్యంలో రావులను బీఆర్ఎస్ వైపు మళ్లేలా చేశాయన్న టాక్ వనపర్తిలో జోరుగా సాగుతోంది. రావుల కూడా ప్రత్యక్ష ఎన్నికల్లో పోటీ చేసేందుకు సుముఖంగా లేకపోవడంతో, ఆయనకు బీఆర్ఎస్ నుంచి రాజ్యసభ, లేదా మహబూబ్ నగర్ పార్లమెంటు నుంచి బరిలో దించి ఎమ్మెల్యేల మద్దతుతో గెలిపించుకుంటామన్న గులాబీ బాస్‍ హామీతో రావుల బీఆర్ఎస్ గూటికి చేరినట్టు తెలుస్తోంది. ఈ క్రమంలో రావులను కారెక్కించుకునేందుకు గులాబీ పెద్దలు తెరవెనుక పెద్ద తతంగమే నడిపారన్న ప్రచారం జోరుగా వినిపిస్తోంది. చంద్రబాబు బినామీగా ముద్రపడ్డ రావులను.. నయాన కాకపోతే భయాన అయినా సరే కారెక్కించుకోవాల్సిందే అన్న నిర్ణయం తీసుకోవడం వల్లే ఈ పాచిక పారిందంటున్నారు స్థానిక రాజకీయ పరిశీలకులు. ఆంద్రప్రదేశ్‍ లో చంద్రబాబు నాయుడును అక్కడి జగన్ సర్కారు చిక్కుల్లోకి నెట్టినట్టుగానే.. ఇక్కడ తాము కూడా... రావులకు అలాంటి పరిస్థితి తీసుకురాగలమన్న హెచ్చరికల కారణంగానే రావుల దారికి వచ్చినట్లుగా తెలుస్తోంది.
ఐతే గతంలోనూ బీఆర్ఎస్ నుంచి రావులకు పార్టీలో చేరాల్సిందిగా పలు మార్లు ఆఫర్లు వచ్చినా... ఆయన సున్నితంగా తిరస్కరించారు. కానీ ఎన్నికల నేపథ్యంలో ఈసారి ఆయన మాత్రం పార్టీలో చేరక తప్పని పరిస్థితి ఏర్పడిందంటున్నారు. అయితే రావుల చేరిక మంత్రి నిరంజన్ రెడ్డికి బాగా కలిసి వస్తుందనడంలో ఎలాంటి సందేహం లేదన్న టాక్ బలంగా వినిపిస్తోంది. గతంలో నిరంజన్ రెడ్డికి ముఖ్య అనుచరుడిగా ఉన్న మేఘారెడ్డి.. ఇప్పుడు ఏకు మేకై కూర్చున్నాడు. నిరంజన్ రెడ్డిని వ్యతిరేకిస్తూ మేఘారెడ్డి కాంగ్రెస్ లో చేరారు. ఐతే ఒకప్పుడు టీడీపీ నేత ఐన మేఘారెడ్డి రావుల చంద్రశేఖర్ రెడ్డికి అత్యంత సన్నిహితుడుగా ఉండేవారు. టీడీపీ క్రమంగా బలహీనపడుతున్న నేపథ్యంలో స్వయంగా రావుల చంద్రశేఖర్ రెడ్డే... మేఘారెడ్డిని బీఆర్ఎస్ లోకి పంపించారన్న ప్రచారం సాగింది. ఐతే అలా రావుల మద్దతుతో బీఆర్ఎస్ లోకి వెళ్లిన మేఘారెడ్డి.. మంత్రి నిరంజన్ రెడ్డిని వ్యతిరేకిస్తూ కాంగ్రెస్ లో చేరి టికెట్టు కోసం గట్టిగా ప్రయత్నాలు చేస్తున్నారు. రాజకీయాలకు దూరంగా ఉంటున్న రావుల, కాంగ్రెస్ పార్టీలో చేరిన పెద్దమందడి ఎంపీపీగా ఉన్న మేఘారెడ్డికి రావుల మద్దతు ఉంటుందని... ఈ క్రమంలో రావుల వెంట ఉన్న సంప్రదాయ ఓటుబ్యాంకు మేఘారెడ్డివైపు మళ్లకుండా.. బీఆర్ఎస్ కే మళ్లించుకునేందుకు రావులను ప్రణాళిక బద్ధంగా గులాబీ పెద్దలు వ్యవహిరించి సఫలీకృతులు కావడం వనపర్తి రాజకీయాల్లో చర్చాంశంగా మారింది.
వనపర్తిలో అధిక మెజారిటీ సాధించడమే లక్ష్యంగా బీఆర్ఎస్ నేతలు ప్రచారాన్ని హోరెత్తిస్తున్నారు. 2014 ఎన్నికల్లో చివరిసారి పోటీచేసిన రావుల చంద్రశేఖర్ రెడ్డికి 45 వేల పైచిలుకు ఓట్లు లభించాయి. తర్వాత 2018లో ఆయన పోటీకి దూరంగా ఉన్నారు. ఈసారి కూడా ప్రత్యక్ష ఎన్నికలకు దూరంగానే ఉంటున్నారు. గతంలో రాజ్యసభ ఎంపీగా పనిచేసిన అనుభవం ఉండటం.. బీఆర్ఎస్ లో చేరడం ద్వారా రావులకు ఇప్పటికిప్పుడు శాసనమండలి సభ్యత్వం ఇచ్చి.. తర్వాత మహబూబ్ నగర్ పార్లమెంట్ నుంచి బరిలోకి దించుతామని ప్రతిపాదనలు ఆయన ముందు ఉంచినట్లు సమాచారం. అయితే ఈసారి వనపర్తిలో ప్రతిపక్షాలకు డిపాజిట్లు రాకుండా చేయాలనే ఉద్దేశంలో భాగమే.. రావులను బీఆర్ఎస్ లోకి లాగినట్టు వనపర్తి నియోజకవర్గంలో జోరుగా ప్రచారం సాగుతోంది. మొత్తానికి రావుల రాకతో నిరంజన్ రెడ్డి గెలుపు మరింత పక్కాగా మారుతుందని ఆ పార్టీ శ్రేణులు సంబరపడుతున్నాయి. మరి.. రావుల రాక ఫలితం ఎంతమేరకు నిరంజన్ రెడ్డికి బదిలీ అవుతుందనేది చూడాలి.
Comments
Post a Comment
Your Comments Please: